#രക്ഷകന്റെ മുഖംമൂടിയണിഞ്ഞ പ്രതി; കൊച്ചിയിലെ പിഞ്ചുകുഞ്ഞിനെ ഉപേക്ഷിച്ച സംഭവത്തിൽ നിർണ്ണായക വഴിത്തിരിവ്കൊച്ചി: ജനിച്ചയുടനെ ചോരക്കുഞ്ഞിനെ വഴിയിൽ ഉപേക്ഷിച്ച ക്രൂരതയ്ക്ക് പിന്നിൽ സിനിമയെ വെല്ലുന്ന തിരക്കഥ. കുഞ്ഞിനെ വഴിയിൽ ഉപേക്ഷിക്കപ്പെട്ട നിലയിൽ കണ്ടെത്തിയെന്ന് പൊലീസിനെയും മാധ്യമങ്ങളെയും ആദ്യം വിവരമറിയിച്ച പുതിയകാവ് സ്വദേശി മിഥുനെ പൊലീസ് കസ്റ്റഡിയിലെടുത്തു. കുഞ്ഞിനെ ഉപേക്ഷിച്ചതിൽ ഇയാൾക്ക് നേരിട്ട് പങ്കുണ്ടെന്ന് തെളിഞ്ഞതോടെയാണ് ‘രക്ഷകൻ’ പ്രതിസ്ഥാനത്തായത്. സംഭവവുമായി ബന്ധപ്പെട്ട് കുഞ്ഞിന്റെ അമ്മയായ ഇടുക്കി സ്വദേശിനി (32) യെയും പൊലീസ് തിരിച്ചറിഞ്ഞിട്ടുണ്ട്.രക്ഷകനായി അഭിനയിച്ച നാടകം പൊളിഞ്ഞുഇന്ന് രാവിലെ മാധ്യമങ്ങൾക്ക് മുന്നിൽ വന്ന് താനാണ് കുഞ്ഞിനെ ആദ്യം കണ്ടതെന്നും പൊലീസിൽ വിവരമറിയിച്ചതെന്നും മിഥുൻ അവകാശപ്പെട്ടിരുന്നു. എന്നാൽ ഇയാളുടെ മൊഴികളിലെ പരസ്പരവിരുദ്ധമായ കാര്യങ്ങളും അസ്വാഭാവിക പെരുമാറ്റവും പൊലീസിന് സംശയമുണ്ടാക്കി. തുടർന്ന് മരട് പൊലീസ് നടത്തിയ വിശദമായ ചോദ്യം ചെയ്യലിലാണ് നാടകീയമായ വിവരങ്ങൾ പുറത്തുവന്നത്.കഴിഞ്ഞ രണ്ടു ദിവസമായി കുഞ്ഞിനെ സുരക്ഷിതമായി ‘അമ്മത്തൊട്ടിലിൽ’ ഉപേക്ഷിക്കാൻ ഇവർ ശ്രമിച്ചിരുന്നു. എന്നാൽ അവിടെയെല്ലാം ആളുകളുടെ സാന്നിധ്യമുണ്ടായിരുന്നതിനാൽ ഈ നീക്കം പരാജയപ്പെടുകയായിരുന്നു.‘അമ്മത്തൊട്ടിൽ’ പരാജയപ്പെട്ടു, ഒടുവിൽ വഴിയിലുപേക്ഷിച്ചുഅമ്മത്തൊട്ടിലിൽ കുഞ്ഞിനെ മാറ്റാൻ കഴിയാതെ വന്നതോടെയാണ് യുവതി മിഥുന്റെ സഹായം തേടിയത്. തുടർന്ന് ഇരുവരും ചേർന്ന് കുണ്ടന്നൂരിലെ ആളൊഴിഞ്ഞ സ്ഥലത്ത് കുഞ്ഞിനെ കൊണ്ടുവന്ന് ഉപേക്ഷിക്കുകയായിരുന്നു. എന്നാൽ കുഞ്ഞിന് ജീവാപായം ഉണ്ടാകരുത് എന്ന ഉദ്ദേശത്തോടെ, അവിടെ ഉപേക്ഷിച്ച ഉടൻ തന്നെ മിഥുൻ തന്ത്രപരമായി പൊലീസിനെ വിളിച്ചറിയിക്കുകയായിരുന്നു. വിവരമറിഞ്ഞ് ഉടൻ തന്നെ സ്ഥലത്തെത്തിയ പൊലീസ് കുഞ്ഞിനെ സുരക്ഷിതമായി ആശുപത്രിയിലേക്ക് മാറ്റി.അമ്മയെ തിരിച്ചറിഞ്ഞു; അച്ഛനായി തെരച്ചിൽകുഞ്ഞിന്റെ മാതാപിതാക്കളെക്കുറിച്ച് പൊലീസിന് വ്യക്തമായ വിവരം ലഭിച്ചിട്ടുണ്ട്. ഇടുക്കി സ്വദേശിനിയായ അമ്മയെ പൊലീസ് സ്റ്റേഷനിൽ വിളിച്ചുവരുത്തി പ്രാഥമികമായി ചോദ്യം ചെയ്യുകയും വൈദ്യപരിശോധനയ്ക്ക് വിധേയമാക്കുകയും ചെയ്തു. നിലവിൽ കസ്റ്റഡിയിലുള്ള മിഥുൻ കുഞ്ഞിന്റെ പിതാവല്ലെന്നും യുവതിയെ ക്രൂരകൃത്യത്തിന് സഹായിച്ചയാൾ മാത്രമാണെന്നും പൊലീസ് സ്ഥിരീകരിച്ചു. കുഞ്ഞിന്റെ പിതാവും ഇടുക്കി സ്വദേശിയാണെന്നാണ് സൂചന.യുവതിയോട് നാളെ രാവിലെ വീണ്ടും സ്റ്റേഷനിൽ ഹാജരാകാൻ നിർദ്ദേശിച്ചിട്ടുണ്ട്. കുഞ്ഞിനെ ഉപേക്ഷിച്ച സംഭവത്തിൽ പൊലീസ് നിലവിൽ കേസെടുത്തിട്ടുണ്ട്. കുഞ്ഞ് ഇപ്പോൾ ആശുപത്രിയിൽ സുരക്ഷിതമായിരിക്കുന്നുവെങ്കിലും, പിഞ്ചുകുഞ്ഞിനെ വഴിയിൽ ഉപേക്ഷിച്ച ക്രൂരകൃത്യമായതിനാൽ ശക്തമായ നിയമനടപടികളുമായി മുന്നോട്ട് പോകാനാണ് പൊലീസിന്റെ തീരുമാനം. സംഭവത്തിൽ ഇവർക്ക് പുറമെ മറ്റാർക്കെങ്കിലും പങ്കുണ്ടോ എന്നും പൊലീസ് അന്വേഷിച്ചുവരികയാണ്.
