നടനും രാഷ്ട്രീയക്കാരനുമായ പവൻ കല്യാണ്‍ ആന്ധ്രാപ്രദേശ് മന്ത്രിസഭയില്‍ ഉപമുഖ്യമന്ത്രി സ്ഥാനം തേടുമെന്ന് വൃത്തങ്ങള്‍ അറിയിച്ചു.
തെലുങ്കുദേശം പാർട്ടി (ടിഡിപി) അധ്യക്ഷൻ എൻ ചന്ദ്രബാബു നായിഡു ബുധനാഴ്ച മുഖ്യമന്ത്രിയായി സത്യപ്രതിജ്ഞ ചെയ്യും. തൻ്റെ പാർട്ടിയായ ജനസേനയ്ക്ക് പവൻ കല്യാണ്‍ അഞ്ച് കാബിനറ്റ് പദവികളും തേടും.
ചൊവ്വാഴ്ചയാണ് പവൻ കല്യാണിനെ ജനസേന നിയമസഭാ കക്ഷി നേതാവായി ഏകകണ്ഠമായി തിരഞ്ഞെടുത്തത്.
ജെഎസ്പിയുടെ മുതിർന്ന നേതാവ് നാദേന്ദ്‌ല മനോഹർ പേര് നിർദ്ദേശിച്ചതോടെ എല്ലാ പാർട്ടി എംഎല്‍എമാരുടെയും പിന്തുണ അദ്ദേഹത്തിന് ലഭിച്ചു.
164 നിയമസഭാ സീറ്റുകളുടെ (ടിഡിപി-135, ജനസേന-21, ബിജെപി-8) ഭൂരിപക്ഷത്തോടെ ആന്ധ്രാപ്രദേശില്‍ എൻഡിഎ വൻ വിജയം നേടി.
ജൂണ്‍ 17 ന് എംഎല്‍എമാരുടെ സത്യപ്രതിജ്ഞയോടെയാണ് ആന്ധ്രപ്രദേശ് നിയമസഭാ സമ്മേളനം ആരംഭിക്കുന്നത്. സ്പീക്കറെ അടുത്ത ദിവസം തിരഞ്ഞെടുക്കും
ടി.ഡി.പി – ജെ.എസ്.പി – ബി.ജെ.പി എ.പി കാബിനറ്റ് സീറ്റ് പങ്കിടല്‍ : കാബിനറ്റില്‍ 25 സീറ്റ് ടി.ഡി.പിക്ക് 20 3+1 ഉപമുഖ്യമന്ത്രി സ്ഥാനം ജനസേനക്ക് (പവൻ കല്യാണ്‍) ബി.ജെ.പിക്ക് 2 സീറ്റ്. നാരാ ലോകേഷ് മന്ത്രിസഭയില്‍ മന്ത്രിസ്ഥാനം എടുക്കാൻ മടിച്ചു. പാർട്ടിക്കുള്ളില്‍ പ്രവർത്തിക്കാനാണ് താൻ ആഗ്രഹിക്കുന്നതെന്ന് അദ്ദേഹം പറഞ്ഞു.
തെലുങ്കു സിനിമയിലെ സൂപ്പർ താരമായ പവൻ കല്യാണ്‍ മറ്റൊരു സൂപ്പർ താരമായ ചിരഞ്ജീവിയുടെ ഇളയ സഹോദരൻ കൂടിയാണ്.
ആന്ധ്രാപ്രദേശിലെ പിതപുരം നിയമസഭാ സീറ്റില്‍ നിന്നാണ് പവൻ കല്യാണ്‍ വിജയിച്ചത്. വൈഎസ്‌ആർസിപിയുടെ വംഗ ഗീത വിശ്വനാഥത്തിനെതിരെയാണ് പവൻ കല്യാണ്‍ മത്സരിച്ചത്. 70,000-ത്തിലധികം വോട്ടിൻ്റെ ഭൂരിപക്ഷത്തിലാണ് അദ്ദേഹം വിജയിച്ചത്.
തിരഞ്ഞെടുപ്പ് വിജയത്തില്‍ രാം ചരണ്‍, അല്ലു അർജുൻ, സായ് ധരം തേജ്, അദിവിശേഷ്, വരുണ്‍ കൊണിഡേല, നാനി തുടങ്ങി നിരവധി തെലുങ്ക് സിനിമയിലെ സഹതാരങ്ങള്‍ അദ്ദേഹത്തിന് അഭിനന്ദനം അറിയിച്ചു.
