ബംഗളുരു: കാമുകനുമായുള്ള ബന്ധത്തിന് തടസമായതിനാല്‍ കുഞ്ഞിനെ മാതാവ് പുഴയില്‍ എറിഞ്ഞുകൊന്നു. ഒന്നരവയസുകാരന്‍ ദേവരാജാണ് കൊല്ലപ്പെട്ടത്.
സംഭവത്തില്‍ കുട്ടിയുടെ അമ്മ ഭാഗ്യമ്മ(21)യെ പോലീസ് അറസ്റ്റ് ചെയ്തു.
രാമനഗര ജില്ലയിലെ ചന്നപട്ടണയില്‍ ചൊവ്വാഴ്ച രാത്രിയാണ് സംഭവം. കുട്ടി പുഴയില്‍ വീണെന്നാണ് യുവതി ആദ്യം പറഞ്ഞത്. ഇവരുടെ പെരുമാറ്റത്തില്‍ സംശയംതോന്നി നടത്തിയ ചോദ്യംചെയ്യലില്‍ യുവതി കുറ്റം സമ്മതിക്കുകയായിരുന്നു.
തുണിയലക്കാനെന്ന വ്യാജേന പുഴക്കരയിലെത്തി യുവതി മകനെ വെള്ളത്തിലെറിയുകയായിരുന്നു. പിന്നീട് കുട്ടി പുഴയില്‍ വീണെന്നുപറഞ്ഞ് ആളുകളെ വിളിച്ചുകൂട്ടി. തിരച്ചിലില്‍ ബുധനാഴ്ച രാവിലെയാണ് കുട്ടിയുടെ മൃതദേഹം കണ്ടെത്തിയത്.
ആണ്‍സുഹൃത്തുമായി പുറത്തുപോകാന്‍ കുട്ടി തടസമായതോടെ യുവതി കുട്ടിയെ ഇല്ലാതാക്കാന്‍ തീരുമാനിക്കുകയായിരുന്നു. മാസങ്ങള്‍ക്ക് മുമ്ബാണ് യുവതി ഭര്‍ത്താവിന്റെ വീട്ടില്‍നിന്ന് സ്വന്തംവീടായ ചന്നപട്ടണയിലെത്തിയത്. പിന്നീട് സമീപവാസിയായ യുവാവുമായി അടുപ്പത്തിലായി. കുട്ടിയെ വീട്ടിലാക്കി യുവതി യുവാവിനൊപ്പം പുറത്തുപോകുന്നത് പതിവായതോടെ വീട്ടുകാര്‍ ഇവരുടെ ബന്ധം വിലക്കിയിരുന്നു.
ഇതോടെ കുട്ടിയെ ഒഴിവാക്കാന്‍ തീരുമാനിക്കുകയായിരുന്നു. യുവതിയുടെ കാമുകന് കൊലപാതകവുമായി ബന്ധമുണ്ടോയെന്ന് പോലീസ് പരിശോധിച്ചുവരുകയാണ്.
